Poetry of Dr Shozab Kazmi

ہمارا ناز یہی ہے کہ ہم حسینؑ کے ہیں

سروں پہ چھائے یہ ابرِ کرم حسینؑ کے ہیں

دل و نظر پہ سبھی غم رقم حسین ؑ کے ہیں

ہماری سانسوں میں جاری یہ دم حسینؑ کے ہیں

دلیل پائی ہے ، یہ "اِرجعی" کی آیت سے

معاملاتِ وجود و عدم حسینؑ کے ہیں

ہے جادہ کلمہ و دیں کا جو آج بھی روشن

میانِ راہ ، نقوشِ قدم حسینؑ کے ہیں

اِنہی کا نام ہے رومالِ زہرا کے گوہر

ہماری پلکوں پہ جو اشکِ غم حسینؑ کے ہیں

رِدائیں چھین کے ، خیمے جلا کے اُمّت نے

جنہیں بنایا ہے قیدی حرم حسینؑ کے ہیں

حسینؑ لکھتے ہیں تقدیرِ فُطرس و راہب

کچھ اِس میں شک نہیں ، لوح و قلم حسینؑ کے ہیں

یہی نہیں کہ فقط کربلا ہے مولا کی

سبھی مناظرِ عرش و اِرَم حسینؑ کے ہیں

مُعّلیٰ کرنے کو گمنام خِطّہ ، اے شوذب

" زمینِ کرب و بلا پر قدم حسین کے ہیں "